ओली समूहले नारायणहिटीमा आज शक्ति प्रदर्शन गर्दै
काठमाडौं,माघ २३। सत्तारुढ नेपाल कम्युनिस्ट पार्टी (नेकपा) ओली समूहले आज नारायणहिटी अगाडि शक्ति प्रदर्शन गर्दै छन् ।
यसअघि प्रचण्ड माधव समूहले काठमाडौंमा शक्ति प्रदर्शन गरेपछि ओली समूहले आज प्रदर्शनसहित आमसभा गर्न लागेको हो ।
यो समूहले शक्ति प्रदर्शनका लागि विभिन्न जिल्लाबाट कार्यकर्ता काठमाडौं आर्दै छन्। आजको सभामा ३ लाख कार्यकर्ता उतार्ने दाबी ओली समूहले गरेकाे छ।
सभालाई कामचलाउ सरकारका प्रधानमन्त्री केपी शर्मा ओलीलगायत मन्त्री र नेताहरुले सम्बोधन गर्ने कार्यक्रम तय भएको छ । कार्यक्रमको प्रचारका लागि युवा संगठनले बिहीबार साँझ काठमाडौंमा मार्चपाससमेत गरेको थियो ।
काठमाडौंमा जम्मा भएका कार्यकर्ताहरु विभिन्न १३ ठाउँबाट प्रदर्शनसहित निस्किनेछन् । त्यसपछि मध्याह्न १२ बजे नारायणहिटीमा आमसभा सुरू हुनेछ ।
प्रधानमन्त्रीको सिफारिसमा राषट्रपति विद्या भण्डारीले संसद विघटन गरेपछि नेकपा २ टुक्रा भएको छ । त्यसयता दुवै समूहले सडक प्रदर्शन र भेलालाई तीव्र बनाएका छन् ।