जाजरकोट जिप दुर्घटना- ३ को मृत्यु, ३ को अवस्था गम्भीर
काठमाडौं । जाजरकोटको जुनिचाँदे गाउँपालिका–५ वलेबनमा जिप दुर्घटना हुँदा ३ जनाको मृत्यु भएको छ । जिप सडकबाट ५० मिटर तल खसेको बताइएको छ । दुर्घटनामा अन्य आठजना घाइते भएका छन् ।
मृत्यु हुनेमा जिपमा सवार दैलेखको गुराँस गाउँपालिका– ७ की कालिका शाही, सोही गाउँपालिका– ५ शिवपुरीकी पुतला गिरी र सोही स्थानका दर्शन शाही रहेका छन् ।
दुईजनाको घटनास्थलमै र एक जनालाई उपचारको लागि लैजाने क्रममा बाटोमै मृत्यु भएको प्रहरीले जनाएको छ । घाइतेमध्ये चालकसहित तीन जनाको अवस्था गम्भीर रहेको छ ।
लुहादहबाट शिवपुरीतर्फ जाँदै गरेको कर्णाली प्रदेश ०२–००१ च ०३४१ नम्बरको जिप आज बिहान साढे ७ बजे ब्रेक फेल भएर पल्टिएको इलाका प्रहरी कार्यालय गर्खाकोट जाजरकोटले जनाएको छ ।
घाइते भएका अन्य सबैलाई उद्धार गरि उपचारका लागि जिल्ला अस्पताल जाजरकोट तर्फ पठाइएको छ । केहीलाई हेलिकोप्टरबाट अन्यत्र लैजाने तयारी समेत भएको छ ।