देशभर सहुलियत पसल भोलिदेखि सञ्चालन हुँदै
काठमाडौं । देशभर सरकारी सहुलियत पसल शनिबारदेखि सञ्चालनमा आउने भएको छ । सहुलियत पसल सञ्चालनको सम्पूर्ण तयारी सकिएको उद्योग, वाणिज्य तथा आपूर्ति मन्त्रालय मातहतको खाद्य व्यवस्था तथा व्यापार कम्पनीले जनाएको छ ।
१ असोज बिहान ११ बजेदेखि कम्पनीको थापाथलीस्थित प्रादेशिक कार्यालयबाट दशैं, तिहार र छठ लक्षित सहुलियत पसल सञ्चालन आरम्भ हुने कम्पनीका नायव महाप्रबन्धक श्रीमणिराज खनालले बताए ।
‘सहुलियत पसल सञ्चालनको सबै तयारी सकिएको छ,’ खनालले भने, ‘उद्योग, वाणिज्य तथा आपूपर्ति मन्त्रीले उद्घाटन गर्ने गरी बिहान ११ बजे कार्यक्रम तय भएको छ ।सहुलियत पसल ४५ दिनसम्म सञ्चालनमा आउने छन् ।
खाद्य व्यवस्था तथा व्यापार कम्पनी, साल्ट ट्रेडिङ र दुग्ध विकास संस्थासहितको सहभागीतामा सञ्चालन हुने सहुलियत पसल खाद्य व्यवस्था तथा व्यापार कम्पनीले काठमाडौंमा रामशाहपथ, थापाथली, नख्खु र केन्द्रीय कार्यालयमा सञ्चालन गर्ने छ ।
उपत्यका बाहिरका ४० जिल्लाका ३९ स्थानमा पनि खाद्यको सुपथ पसल सञ्चालन हुनेछन् । यस्तै साल्ट ट्रेडिङले पनि संयुक्त र बेग्ला बेग्लै गरी देशभर ३८ वटा स्थानमा सहुलियत पसल सञ्चालन गर्ने छ ।
सहुलियत पसलमा चामल, चिउरा, गेडागुडी, तेल, दाल, मैदा, आँटा, नुन, पनिर, घ्यु, जिउँदा खसी बोका र च्यांग्रा लगायत बिक्रीमा हुनेछन् । सहुलियत पसलमा कम्तीमा २ रुपैयाँदेखि ५० रुपैयाँसम्म छुट पाइने छ ।
सुपथ मूल्य पसलमा चामल, दाल, आटा, मैदा, चिउरा र खाने तेलमा प्रतिकिलो तथा प्रतिलिटरमा ७ रुपैयाँ छुट पाइने छ । कर्णाली सीमी तथा गेडागुडीमा प्रतिकिलो १० रुपैयाँ, जिउँदो खसी, बोका र च्यांग्रामा प्रतिकिलो १० रुपैयाँ छुट हुनेछ ।
नुन किलोमा २ रुपैयाँ, घिउ किलोमा ५० रुपैयाँ र पनि तथा चिजमा प्रतिकिलो २० रुपैयाँ छुट पाइने छ । यस्तै घटस्थापनादेखि तिहारसम्म दही प्रतिलिटरमा १० रुपैयाँ छुट पाइने छ । खसी बोका र च्यांग्राको खरिद मूल्य भने तोक्न बाँकी छ ।