उपचारपछि फर्किए कांग्रेस नेता चन्द्र भण्डारी
काठमाडौं। नेपाली कांग्रेसका नेता चन्द्र भण्डारी उपचार गरेर स्वदेश फर्किएका छन्। भारतको मुम्बईस्थित नेशनल बर्न अस्पतालमा उपचारपछि नेता भण्डारी आइतबार साँझ स्वदेश फर्किएका हुन्।
गत फागुन ३ गते राति आफ्नो निवास बुद्धनगरमा ग्यास लिक भएर आगालागीबाट गम्भीर घाइते भण्डारी स्वास्थ्य उपचारपछि आइतबार फर्किएका हुन्।
उनको भारतको मुम्बईस्थित नेशनल बर्न सेन्टरमा उपचार गरिएको थियो।अहिले नेता भण्डारीको स्वास्थ्यमा सुधार आएको छ। उनी बोल्ने र हिँड्ने गर्न थालेका छन्।
आगलागीमा परी नेता भण्डारी र उनकी आमा हरिकला भण्डारी गम्भीर घाइते भएका थिए। उनकी आमा हरिकलाको भने उपचारका क्रममा कीर्तिपुर अस्पतालमा फागुन ४ गते निधन भएको थियो।
त्रिभुवन विमानस्थलमा पत्रकारसँग कुरा गर्दै आमा नभएको आफूलाई अहिले भर्खरैमात्रै थाहा भएको बताए।
नेपाल फर्केसँगै अब नेता भण्डारीले घरमै फिजियोथेरापी गर्नुका साथै पोलेको घाउ ड्रेसिङ गर्न अस्पताल जानेछन्।