सुदूरपश्चिम प्रदेशमा माघीमा बिदा नदिइने
काठमाडौं।सुदूरपश्चिम प्रदेश सरकारले थारुहरुको सबैभन्दा ठूलो पर्व माघीमा यसवर्ष बिदा नदिने भएको छ । प्रदेश सरकार गठन भएयता माघ १ र २ गते प्रदेशभरि माघीमा सार्वजनिक बिदा दिँदै आएकोमा यसवर्ष कटौती गरेको हो।
एक हप्ताअघि सार्वजनिक भएको प्रदेश सरकारको २०८० सालको सार्वजनिक बिदा सम्बन्धी सूचनामा प्रदेश सरकारले पाँच वटा पर्वमा बिदा दिने निर्णय गरेको उल्लेख छ।
चैत २२ गते बसेको मन्त्रीपरिषद्को बैठकले प्रदेशमा मनाइने प्रमुख पर्वहरुमा बिदा दिने निर्णय गरेको सूचनामा उल्लेख छ।
सो निर्णय अनुसार प्रदेशभर सबै सरकारी कार्यालय तथा सार्वजनिक निकायमा बिदा हुने उल्लेख छ। प्रदेशभर भदौ १ गते ओल्के पर्व, भदौ ८ गते गौरा पर्व शनिवार परेको अवसरमा (थप एक दिन बिदा), भदौ ३१ गते थारुहरुको पर्व अटवारी, पुस २६ गते भुवा पर्व र चैत १९ गते खखडेहरा पर्वमा बिदा दिने निर्णय गरेको उल्लेख छ।
सो राजपत्रमा भनिएको छ –‘खण्ड (क) मा तोकिए बमोजिमका बिदाको अतिरिक्त थप एक दिनको बिदा दिनुपर्ने भएमा आन्तरिक मामिला तथा कानुन मन्त्रालयको मन्त्रीस्तरिय निर्णयमार्फत प्रदेश राजपत्रमा सूचना प्रकाशन गरी बिदा दिने।