टी–२० विश्वकप छनोट: फाइनलमा आज नेपाल र ओमान भिड्दै
काठमाडौं । आईसीसी टी–२० विश्वकप छनोटको फाइनलमा नेपाल आज ओमानसँग भिड्दै छ। खेल आज ११ बजे त्रिभुवन विश्वविद्यालयको मैदानमा हुनेछ।
फाइनलमा पुगेका दुवै टोली विश्वकपका लागि छनोट भइसकेका छन्। नेपालले सेमिफाइनलमा यूएईलाई ८ विकेटले पराजित गर्दै विश्वकपमा आफ्नो स्थान पक्का गरेको हो भने ओमानले बहराइनलाई १० विकेटले हराएको थियो।
यस प्रतियोगितामा नेपाल र ओमान समूह चरणको खेलमा आमनेसामने भइसकेका छन्। समूह ए अन्तरगत भएको खेलमा ओमानले नेपाललाई रोमाञ्चक खेलमा ५ रनले हराएको थियो। आजको खेलमा नेपालसँग उक्त हारको बदला लिने अवसर रहेको छ।
दुई टोलीबिच भएका ५ खेलमा नेपालले ३ तथा ओमानले २ खेल जितेको छ । तर, ओमान पछिल्लो समय राम्रो लयमा देखिएको छ। टोली पछिल्ला ५ खेलमा अपराजित रहेको छ। नेपालले भने पछिल्ला ५ मध्ये ३ खेलमा जीत र दुई खेलमा हार बेहोरेको छ।