१४ जना जुवाडे पक्राउ
काठमाडौं। काठमाडौं र ललितपुरबाट १४ जना जुवाडे पक्राउ परेका छन्।प्रहरीका अनुसार काठमाडौंबाट आठ र ललितपुरबाट ६ जनालाई नियन्त्रणमा लिएको हो।
काठमाडौँको बत्तीसपुतलीमा जुवातास खेलिरहेको अवस्थामा रामेछापको गोकुलगंगा गाउँपालिका–६ का ४० वर्षीय उमेश सुनुवारसहित आठजना पक्राउ परेका हुन्।
सुनुवारले भाडामा लिएको घरमा जुवातास खेलिरहेको अवस्थामा सोमबार दिउँसो उनीहरूलाई पक्राउ गरिएको प्रहरीले जनाएको छ।
नगद दुई लाख ५२ हजार ५७५ रुपैयाँ र १२ बुक ताससहित उनीहरूलाई पक्राउ गरिएको प्रहरी प्रधान कार्यालयले जानकारी गराएको छ।
यस्तै,ललितपुर महानगरपालिका–२५, फूलबारीमार्गस्थित सुर्खेती सेकुवा कर्नर होटेलमा जुवातास खेलिरहेको अवस्थामा ६ जना पक्राउ परेका छन्।
पक्राउ पर्नेमा मकवानपुरको थाहा नगरपालिका–१२ घर भई ललितपुरको भैँसेपाटीमा बस्दै आएका ३० वर्षीय श्याम तामाङसहित ६ जना छन्।
नगद ४८ हजार २७० रुपैयाँ र ६ बुक ताससहित सोमबार दिउँसो उनीहरूलाई पक्राउ गरिएको प्रहरीले जनाएको छ। पक्राउ परेका उनीहरूमाथि थप अनुसन्धान भइरहेको प्रहरीले जनाएको छ।