दर्शन :द्वन्द्वात्मक तथा ऐतिहासिक भौतिकवादको ऐतिहासिक कार्यभार 

 

यो विषय समाजमा विद्यमान जनता र दुश्मन वर्गबीचका अन्तर्विरोधहरुलाई ठिक ढंगले बुझ्ने र तिनको वैज्ञानिक तरिकाले समाधान गर्ने विषय हो। यो विषय नयाँ जनवादी , वैज्ञानिक समाजवादी तथा सिंगो सामाजिक क्रान्ति सम्पन्न गर्ने कामसंग सम्बन्धित रहेको।

 

   

यो  विषय कम्युनिस्ट पार्टी भित्र चल्ने दुईलाइन संघर्षलाई ठिक बुझ्ने र त्यसको सही ( मार्क्सवादी ) ढंगले समाधान गर्ने विषय हो। यो विषय कम्युनिस्ट पार्टीलाई क्रान्तिकारी बनाउँदै त्यसको नेतृत्वमा सामाजिक क्रान्तिलाई सचेत तथा प्रभावकारी ढंगले अगाडि बढाउने विषय हो।

 

 

यो विषय जनतालाई प्रशिक्षित तुल्याउने , सिंगो जनसमुदायको सहभागीतनमा सामाजिक क्रान्ति सम्पन्न गर्ने र जनताका समग्र उत्पादनमूलक सामाजिक तथा चिन्तनमूलक गतिविधिहरुलाई योजनाबध्द रुपमा संगठित तुल्याउँदै अगाडि बढाउने विषय हो ।

 

         

यो प्राकृति विज्ञान र सामाजिक विज्ञानका विविध क्षेत्रहरुमा गरिने अध्ययन र अनुसन्धानका कामहरुमा मार्क्सवादी दर्शनका विधिलाई सही ढंगले प्रयोग गर्ने र त्यसका आधारमा विज्ञानसम्मत निष्कर्ष निकाल्ने विषयसंग सम्बन्धित विषय हो।

 

आज हामीले देखिरहेका छौं कि समाजशास्त्र , मानविकी र संस्कृत सहित ज्ञान – विज्ञानका विविध क्षेत्रमा द्वन्द्वात्मक तथा ऐतिहासिक भौतिकवादी विधिलाई लत्याउदै अधिभूतवादी तथा आदर्शवादी विश्वदृष्टिकोणका आधारमा अध्ययन गरि अवैज्ञानिक निष्कर्षमा पुग्ने प्रक्रिया अगाडि बढाइदै छ।

 

यसप्रकारको अवस्थामा सच्चा क्रान्तिकारी मार्क्सवादी – लेनिनवादी – माओवादीहरुले यसप्रकारको अध्ययन विधिको सशक्त रुपमा विरोध र द्वन्द्वात्मक तथा ऐतिहासिक भौतिकवादको विधिलाई दृढताका साथ अलम्बन गर्न आवश्यक छ भन्ने वैज्ञानिक ज्ञान प्रदान गर्नु हो।

 

       

द्वन्द्वात्मक तथा ऐतिहासिक भौतिकवादले कुनै पनि वस्तु र प्रक्रियालाई स्थिर वा शाश्वत मान्दैन तिनलाई गति ,विकास र परिवर्तनको अवस्थामा हेर्दछ। यस दर्शनले जीवनशील र मरणशील। नवीन र पुरातन तथा उत्पीडित र उत्पीडक शक्ति एवं वर्गका बीचको अन्तर्विरोधलाई सजीव रुपमा प्रस्तुत गर्दै समाज विकासको ऐतिहासिक विकासलाई राम्रोसँग ठम्याउँने गर्दछ र यो प्रक्रियामा सामन्तवाद,पुँजीवाद एवं साम्राज्यवाद सहित सबैखाले प्रतिक्रियावाद तथा उत्पीडक वर्ग विनाश  एवम् पराजय र उत्पीडित जनसमुदाय सहित सर्वहारा वर्ग,नयाँ जनवाद,वैज्ञानिक समाजवाद एवं वैज्ञानिक साम्यवादसम्मको विजयको दिशातर्फ अगाडि बढाइरहन्छ भन्ने कुरालाई राम्रोसँग दर्शाउँछ। द्वन्द्वात्मक तथा ऐतिहासिक भौतिकवादी दर्शन क्रान्तिकारी र आलोचनात्मक दुबै हुनुको साथसाथै वैज्ञानिक र आशावादी समेत रहेको छ ।

 

         

यो विषय प्रकृतिजगत , मानव समाज र चिन्तनको क्षेत्रमा विद्यमान अन्तर्विरोधहरुलाई ठिकसंग बुझ्ने र तिनलाई सिंगो मानव जातिको हित अनुकूल बदल्ने विषय हो।

    सच्चा क्रान्तिकारी मार्क्सवादी – लेनिनवादी – माओवादीहरुले द्वन्द्वात्मक तथा ऐतिहासिक भौतिकवादका यस प्रकारका कार्यभारहरुलाई आत्मसात गरि सिंगो विश्व र आफैंलाई बदल्दै अगाडि बढ्नेे महान् ऐतिहासिक अभियानमा संलग्न बन्नु नै मुख्य कर्तव्य हुन आउँछ।

 

क्रान्तिकारी मालेमावादीहरुले सर्वहारा वर्ग तथा उत्पीडित जनसमुदाय र अन्ततः सिंगो मानव जातिकैै सुन्दर , सुसंगत तथा उदात्त प्रकारको नयाँ संसार निर्माण गर्न चाहन्छन् ।नयाँ संसार निर्माण संभव छ , त्यो नयाँ संसार भनेको वर्गबिहीन , राज्यबिहीन वैज्ञानिक साम्यवाद नै हो । अत: यही नै हो  द्वन्द्वात्मक तथा ऐतिहासिक भौतिकवादको ऐतिहासिक कार्यभार।