पर्यटन नीतिमा व्यापक हेरफेर गर्दैछौ: पर्यटन मन्त्री पाण्डे

काठमाडौं। संस्कृति, पर्यटन तथा नागरिक उड्डयनमन्त्री बद्रिप्रसाद पाण्डेले सरकारले पर्यटन क्षेत्रमा रहेका नीतिगत समस्यालाई परिमार्जन गर्ने बताएका छन्। सोमवार ट्रेकिङ एजेन्सिज एशोसिएसन अफ नेपाल (टान) को ४६ औं साधरण सभामा बोल्दै मन्त्री पाण्डेले यस्तो बताएका हुन्।

उनले सरकार पर्यटन नीति परिवर्तन गर्ने संघारमा रहेको बताउँदै संस्कृति नीति, हवाई नीति र पर्यटन ऐन पनि संशोधनको अन्तिम चरणमा पुगेको बताए। त्यसमा निजी क्षेत्रले आवश्यक सुझाव दिन आग्रह समेत गरे। उनले पर्यटन मन्त्रालय सरकारले मात्रै चलाउन असम्भव रहेको पनि बताए।

संस्कृति, पर्यटन र नागरिक उड्डयन मन्त्रालय केवल सरकारको मात्रै नभएको बताउँदै उनले पर्यटन क्षेत्रका चुनौती समाधानको लागि निजी क्षेत्रकै सार्थक हस्तक्षेप र क्रियाशिलता आवश्यक रहेको बताए। निजी क्षेत्रको सक्रियताविना मुलुकको पर्यटन क्षेत्रको विकास नहुने उनको भनाइ छ।

उनले भने, अहिले पर्यटन क्षेत्रमा चुनौती देखिएको छ । पर्यटन क्षेत्रका चुनौती समाधानको लागि निजी क्षेत्रकै सार्थक हस्तक्षेप र क्रियाशिलताको आवश्यक छ। संस्कृति पर्यटन र नागरिक उड्डयन मन्त्रालय केवल सरकारको मन्त्रालय होइन। निजी क्षेत्रको पनि मन्त्रालय हो। भुमिका,कार्यक्षेत्रका दृष्टिकोणले सरकारले मात्रै मन्त्रालय चलाउन असम्भव छ।

निजी क्षेत्रको प्रोएक्टिभ ढङ्गले अग्रसरताका साथ यो मन्त्रालय मेरो पनि हो भन्ने भावना नराख्ने हो भने हाम्रो मन्त्रालय चल्दैन। मुलुकको पर्यटन क्षेत्रको विकास हुँदैन। मन्त्रालयलाई पर्यटन क्षेत्रका काम गर्ने टान लगायतका संस्थासँग निरन्तर पर्यटन संवाद गर्ने वातावरण बनाउँछौं।

मन्त्रालयले निजी क्षेत्रसँग सहकार्य गरेर पर्यटन क्षेत्रको विकास गर्ने अघि बढ्नेछ। निजी क्षेत्रले काम गर्दा सरकारले बनाएका नीतिमा भएका समस्यालाई परिमार्जन गर्न सहयोग गर्नुस्।

सरकार पर्यटन नीति परिवर्तन गर्ने संघारमा छ। संस्कृति नीति,हवाई नीति र पर्यटन ऐन पनि संशोधनको अन्तिम चरणमा पुगेको छ। त्यसमा पनि निजी क्षेत्रका सुझावहरु आउन्।

संस्कृति, पर्यटन तथा नागरिक उड्डयन राज्यमन्त्री अरुणकुमार चौधरीले सरकारले अहिले पनि रफ्तार समाउन नसकेको बताए। उनले मन्त्रालय सम्हालेको ५० दिनसम्म पनि अध्ययनमा नै रहेकाले केही काम हुन नसकेको बताए। मन्त्रीहरु ५० दिनसम्म अध्ययन मात्रै गरेर बस्दा प्रधानमन्त्रीले सोचेजस्तो काम हुन नसकेको उनको भनाइ छ।

राज्यमन्त्री चौधरीले भने, ‘सरकार अहिले पनि रफ्तार समाउन सकेको छैन। सरकार गठन भएको एक महिना भन्दा बढी हुँदा पनि सरकारका मन्त्रीहरुले भने जस्तो काम गर्न सकेका छैनन्। सबै मन्त्रीहरुले समन्वय गरेर काम गर्नुपर्ने आवश्यकता छ। पर्यटन क्षेत्रले नै मुलुकमा युवाहरुलाई रोक्न सक्छ।