दसैंमा कोशी प्रदेशमा २६९ सवारी दुर्घटना, १४ जनाको मृत्यु
काठमाडौं। दसैंमा कोशी प्रदेशमा २६९ वटा सवारी दुर्घटना हुँदा १४ जनाको मृत्यु भएको छ।
नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय इटहरी सुनसरीले बिहीबार पत्रकार सम्मेलन आयोजना गरी दसैंको अवधिमा कोशी प्रदेशमा २६९ वटा सवारी दुर्घटना हुँदा १४ जनाको मृत्यु भएको जनाएको छ।
घटस्थापनादेखि असोज २९ गतेसम्म भएको दुर्घटनामा १३ पुरुष र एक जना महिलाको मृत्यु भएको सुनसरीका प्रमुख प्रहरी उपरीक्षक विनोद घिमिरेले जानकारी दिए।
दुर्घटनामा सबैभन्दा बढी मोरङमा र सबैभन्दा कम धनकुटा र खोटाङमा मृत्यु भएको उनले बताए।
प्रहरी उपरीक्षक घिमिरेका अनुसार मोरङमा ९५ ठाउँमा दुर्घटना हुँदा पाँच जनाको मृत्यु भएको थियो भने १६ जना घाइते भएका थिए।
सुनसरीमा ६५ ठाउँमा सवारी दुर्घटना हुँदा चार जनाको मृत्यु भएको थियो भने सात जना घाइते भएका थिए। झापामा ७२ वटा दुर्घटना हुँदा तीन जनाको मृत्यु भएको थियो। त्यसैगरी धनकुटा र खोटाङमा एक–एक जनाको मृत्यु भएको छ।
बाह्र दिनमा सात हजार ५९१ वटा सवारी कारबाहीमा परेका छन् भने रु ५१ लाख ९५ हजार पाँच सय राजस्व सङ्कलन भएको छ। आर्थिक वर्ष २०७९/८० मा कोशी प्रदेशमा दसैंका बेलामा ६ दिनमा १३५ वटा सवारी दुर्घटना भएको थियो।