एनपीएलः प्लेअफ पुगेका चारवटै टिमले नगद पुरस्कार पाउने
काठमाडौं। नेपाल क्रिकेट संघ (क्यान) ले हाल जारी नेपाल प्रिमियर लिगमा उत्कृष्ट हुने टीमहरुले पाउने पुरस्कार राशीको औपचारिक घोषणा गरेको छ। क्यानका अनुसार विजेता सहित प्लेअफमा पुगेका चारवटै टिमले नगद पुरस्कार पाउने हुन्।
आज क्यानले विज्ञप्ति जारी गर्दै विजेता टिमलाई १ करोड १० लाख रुपैयाँ दिइने जनाएको छ। यस्तै, उपविजेताले ५१ लाख रुपैयाँ पाउने छ। तेस्रो हुने टिमलाई २५ लाख र चौंथो हुनेले भने १५ लाख रुपैयाँ पाउने जनाएको हो।
एनपीएलको प्लेअफमा जनकपुर बोल्ट्स, सुदुरपश्चिम रोयल्स, कर्णाली याक्स र चितवन राइनोजले स्थान बनाएका छन्। प्रत्येक टिमको कम्तिमा १५ लाख पुरस्कार निश्चित भएको छ।
यसअघि क्यानले उत्कृष्ट नेपाली खेलाडीलाई कार दिने बताइसककेको छ। यसबाहेक क्यानले प्रत्येक खेलको प्लेयर अफ दी म्याचलाई ५० हजार र क्याच अफ दी म्याच हुनेलाई २५ हजार प्रदान गर्दै आएको छ।
