काम नगर्ने ११ निर्माण कम्पनीलाई ७ दिने स्पष्टीकरण
काठमाडौं । सरकारले सन्तोषजनक काम नगर्ने ११ वटा निर्माण कम्पनीलाई स्पष्टीकरण सोधेको छ । प्रधानमन्त्री कार्यालय मातहतको सार्वजनिक खरिद अनुगमन कार्यालयले सूचना जजारी गर्दै ती निर्माण कम्पनीलाई अबको एक साताभित्र स्पष्टीकरण बुझाउन निर्देशन दिएको हो ।
यसअघि ३० दिनभित्र स्पष्टीकरण बुझाउन भनिए पनि अटेर गरेका निर्माण कम्पनीलाई अन्तिमपटकका लागि सात दिनको मौका दिइएको सूचनामा उल्लेख छ । आगामी एक साताभित्रमा चित्तबुझ्दो स्पष्टीकरण नबुझाएमा ती ११ निर्माण कम्पनीलाई कालोसूचीमा राख्ने प्रक्रिया अघि बढ्ने कार्यालयले जनाएको छ ।
स्पष्टीकरण सोधिएका निर्माण कम्पनीहरुमा जनकपुरका शिवकुमार महतो सञ्चालक रहेको सिंह कन्स्ट्रक्सन, निरज कुमार मिश्र नेतृत्वको एसडी कन्स्ट्रक्सन, राधेश्याम झा नेतृत्वको शिवम् कन्स्ट्रक्सन, कार्लमाक्स श्रेष्ठ नेतृत्वको राजिता निर्माण सेवा सुर्खेत रहेको छ ।
त्यस्तै सोना उल्लाह खाँ नेतृत्वको विपिन कन्स्ट्रक्सन पाल्पा, भिम तामाङ नेतृत्वको ए एण्ड डी कन्स्ट्रक्सन, गोपाल प्रसाद घिमिरे नेतृत्वको सूर्यविनायक कन्स्ट्रक्सन, श्याम कुमार श्रेष्ठ नेतृत्वको बीटी जयबाबा जेभी काठमाडौँ, तिलकबहादुर मल्ल नेतृत्वको आकांक्षा कन्स्ट्रक्सन काठमाडौँ र बिना बीसी नेतृत्वको यज्ञश्वरी निर्माण सेवा बाँकेलाई पनि सात दिने स्पष्टीकरण सोधिएको छ।