कांग्रेस क्षेत्रीय सभापतिहरुको प्रशिक्षण आजदेखि भैरहवामा सुरु हुँदै
बुटवल । नेपाली कांग्रेसका देशभरका क्षेत्रीय सभापतिहरुको प्रशिक्षण रुपन्देहीको भैरहवामा आजदेखि सुरु हुँदैछ। पार्टीको केन्द्रीय नीति, अनुसन्धान तथा प्रशिक्षण प्रतिष्ठानको आयोजनामा दुईदिनसम्म हुने प्रशिक्षणमा संघीय र प्रदेशसभा निर्वाचन क्षेत्रका सभापति र प्रशिक्षण शाखा प्रमुख गरी ३३० जना सहभागी हुँदैछन्।
१६५ संघीय निर्वाचन क्षेत्रमध्ये १३० निर्वाचन क्षेत्रबाट क्षेत्रीय सभापति र प्रशिक्षण शाखा प्रमुख गरी २६० जना र एउटा मात्र संघीय निर्वाचन क्षेत्र रहेका ३५ जिल्लाका ७० वटा प्रदेश सभा निर्वाचन क्षेत्रबाट ७० जना क्षेत्रीय सभापति गरी ३३० जनालाई प्रशिक्षण दिइने नेपाली कांग्रेस रुपन्देही १ का क्षेत्रीय सभापति हिरा खत्रीले बताए।
खत्रीका अनुसार प्रशिक्षण तथा अभिमुखीकरण कार्यक्रमको उद्घाटन समारोहमा पार्टी सभापति शेरबहादुर देउवा, उपसभापति एवं केन्द्रीय नीति, अनुसन्धान तथा प्रशिक्षण प्रतिष्ठानका प्रमुख पूर्णबहादुर खड्का, नेता डा शेखर कोइराला, दुई महामन्त्री, पूर्वमहामन्त्री, नेताहरु कृष्ण सिटौला,विमलेन्द्र निधि,बालकृष्ण खाँण,रमेश लेखक,आरजु देउवा लगायतका नेताहरु सहभागी हुनेछन्। सभापति देउवा, नेतृ आरजु देउवा राणा आज बिहान भैरहवा आइपुग्ने कार्यक्रम रहेको बताइएको छ।