सिरहाको मिर्चैयामा सञ्चालित १३ स्वास्थ्य संस्था अवैध
जनकपुरधाम । सिरहाका १३ वटा निजी स्वास्थ्य संस्था अवैध पाइएको छ। शनिबार मधेशका मुख्यमन्त्री सतिशकुमार सिंहले सिरहाको मिर्चैयामा विभिन्न १४ निजी स्वास्थ्य संस्थाको अनुगमन गरेका थिए। तीमध्ये १३ वटा अवैध पाइएको हो। अवैध रुपमा सञ्चालन गरिएको ती १३ अस्पताल तथा पोलिक्लिनिकहरूलाई बन्द गराइएको छ।
सिरहाको मिर्चैयामा सञ्चालित सिमित माउन्ट हस्पिटल प्रालि, एस जेके पोलिक्लिनिक, मंगलम हेल्थ केयर सेन्टर, सिद्धकामना हस्पिटल प्रालि, शान्ति हेल्थ केयर प्रालि, बाल संसार हेल्थ केयर प्रालि, राम ओरल एण्ड डेन्टल क्लिनिक, रेखा नर्सिङ होम, मिथिला चश्माघर आँखा उपचार केन्द्र, बालकल्याण हेल्थ केयर प्रालि, विष्णु पोलिक्लिनिक, लक्ष्मी हेल्थ केयर प्रालि र लाइफलाइन क्लिनिक बन्द गराइएको हो।
यस्तै, १५ बेडको सेवा सञ्चालन अनुमति लिएको मनकामना मिड इस्टर्न अस्पतालले पनि मापदण्ड पूरा नगरी २५ शय्याभन्दा बढीको सेवा सञ्चालन गरिरहेको पाइएको छ। यो अस्पताललाई १५ दिनभित्र मापदण्डअनुसार सेवा सञ्चालन गर्न मुख्यमन्त्री सिंशले निर्देशन दिएका छन्।
जनस्वास्थ्य अधिकृत सन्तोषकुमार ठाकुरका अनुसार सो अस्पतालमा आवश्यक आधारभूत स्वास्थ्य सेवा, एनेस्थेसिया विशेषज्ञ तथा भेन्टिलेटर सुविधा नभएको पाइएको छ।
अनुगमन टोली पुगेका बेला सिद्धकामना हस्पिटल प्रालिका सञ्चालक, चिकित्सक, स्वास्थ्यकर्मी र कर्मचारीहरूले अस्पतालमा उपचार गराइरहेका आठ बिरामी र कुरुवालाई भित्रै छोडेर अस्पताल बन्द गरी फरार भएका थिए। सो अस्पतालमा कार्यरत दुईजनालाई प्रहरीले नियन्त्रणमा लिएको छ।
अनुगमनका लागि मिर्चैया पुग्दा स्वास्थ्य सेवा सञ्चालन अनुमति नलिएका आठ अस्पताल तथा पोलिक्लिनिकहरू बन्द गरेर सञ्चालकहरु फरार भएको मुख्यमन्त्रीका प्रेस सल्लाहकार अनिलकुमार कर्णले बताए।
मुख्यमन्त्री सिंहले हालसम्म १५७ निजी स्वास्थ्य संस्थाहरूको अनुगमन गरिसकेका छन्। तीमध्ये १७ वटा अस्पतालमात्र मापदण्डअनुसार सञ्चालनमा रहेका पाइएको थियो।