गर्भवती श्रीमतीको हत्या, खाल्डोमा गाडेपछि प्रहरीलाई दिए हराएको निवेदन
इलाम। श्रीमतीको हत्या गरी खाल्डो खनेर गाडेको आरोपमा प्रहरीले एकजनालाई पक्राउ गरेको छ। यसरी पक्राउ पर्ने इलाम फाकफोकथुम गाउँपालिकाका उमेश गिरी हुन्। गिरीलाई गर्भवती श्रीमतीको हत्या गरेको अभियोगमा प्रहरीले पक्राउ गरेको हो।
जिल्ला प्रहरी कार्यालय इलामका अनुसार फाकफोकथुम गाउँपालिका वडा नं ३ सल्लेरीका २५ वर्षीय उमेश गिरीलाई श्रीमती हत्याको आरोपमा प्रहरीले पक्राउ गरेको हो। श्रीमतीको हत्या गरेपछि उनले हराएको भन्दै चैत १ गते प्रहरी चौकी आमचोकमा निवेदन दिएका थिए।
उनले १९ वर्षीया श्रीमती विमला कट्टेल हराएको निवेदन दिएपछि प्रहरीले खोजतलास गरेको थियो। अनुसन्धानका क्रममा श्रीमानमाथि नै शंका लागेपछि प्रहरीले अनुसन्धान थालेको थियो।
जिल्ला प्रहरी कार्यालय इलामका प्रमुख एसपी एकनारायण कोइरालाका अनुसार अनुसन्धानका क्रममा श्रीमती हराएको भनी प्रहरीमा उजुरी दिने उमेश गिरी नै हत्यामा संलग्न रहेको प्रमाण फेला परेको छ।
प्रहरीका अनुसार अनुसन्धानका क्रममा गिरीले फागुन २९ गते श्रीमतीको हत्या गरेको खुलेको छ। गिरी एक्साभेटर चालक हुन्। उनले श्रीमतीलाई घुम्न जाउँ भनी हत्या गरेर एक्साभेटरले खनेर गाडेको अनुसन्धानका क्रममा खुलेको प्रहरीले जनाएको छ।
विमलाको शव चैत १५ गते फाकफोकथुम गाउँपालिका–२ धार्नेखोपस्थित दाहाल गोलाईबाट गाडेको अवस्थामा प्रहरीले उत्खनन गरेको थियो। पक्राउ परेका गिरीलाई कर्तव्य ज्यान सम्बन्धी कसुरमा जिल्ला अदालतबाट ७ दिनको म्याद थप भएको छ ।