काठमाडौं जिल्लाका एसएसपी अधिकारीको कमाण्ड असफल,कार्यसम्पादन र क्षमता देखिएन

काठमाडौं। राजसंस्थाको पक्षमा भएको प्रदर्शनले हिंसात्मक रूप लिएपछि त्यसलाई नियन्त्रण गर्न स्थानीय प्रशासन पूर्णतः असफल भएको छ।

प्रदर्शनका कारण राजधानीका केही स्थानहरूमा तनाव उत्पन्न भएको सामान्य भन्दा सामान्य अवस्थामा पनि काठमाडौको सुरक्षा व्यवस्थालाई नियन्त्रणमा लिन नसक्नु सुरक्षा अंगको कमजोरीको रुपमा लिइएको छ। प्रधानमन्त्रीसहितको राष्ट्रिय सुरक्षा परिषदमा भएको छलफलमा पनि काठमाडौंको सुरक्षा चुकेको समीक्षा गरिएको थियो।

प्रहरीले शुक्रबार दिउँसो ३ बजेदेखि राति १० बजेसम्म कफ्र्यू लागू गरेको थियो, जुन शनिबार बिहान ७ बजेबाट हटाइएको थियाे। प्रमुख जिल्ला अधिकारी ऋषिराम तिवारीले कफ्र्यू हटाउने निर्णयको सूचना जारी गर्दै स्थिति सामान्य बन्दै गएको बताएपनि काठमाडौं परिसरको कमाण्ड गरेका एसएसपी विश्व अधिकारी कमजोर कमाण्डर बनेका छन्।

प्रदर्शनका क्रममा, राजसंस्था पुनस्र्थापनाका पक्षमा उठेका आवाज र ज्यान गुमाएका दुई युवाको दुखद घटनाले आन्दोलनलाई हिंसात्मक बनायो।

प्रदर्शनकारीहरूले निजी घरहरू, व्यावसायिक भवनहरू, दलका कार्यालय र सवारीसाधनहरूमा तोडफोड र आगजनी गरेका थिए भने कतिपय स्थानमा लुटपाट समेत गरेका थिए।

प्रदर्शनमा व्यवसायी दुर्गा प्रसाईंको नेतृत्वमा राजसंस्था पुनस्र्थापनाका पक्षमा संघर्षरत कार्यकर्ताहरूले हिंसात्मक गतिविधिहरू गरेका थिए।

तीनकुनेमा आयोजना भएको प्रदर्शनमा शुरूवातदेखि नै गडबड र हिंसा फैलिन थालेको थियो। यसतर्फ काठमाडौ परिसर प्रमुखको ध्यान जान नसकेको स्पष्ट भएको छ।

यसै क्रममा, पत्रकार सुरेश रजकले प्रदर्शनको रिपोर्टिङ गर्दै थिए, तर प्रदर्शनकारीहरूले आगो लगाएको भवनमा फसेर उनको मृत्यु भएको थियो। त्यसै दिन प्रहरीको गोलीबाट कीर्तिपुरका सविन महर्जनको पनि ज्यान गयो।

प्रहरीका अनुसार, प्रदर्शनका क्रममा ५३ जना नेपाल प्रहरीका कर्मचारी र २४ जना सशस्त्र प्रहरीका कर्मचारी घाइते भए। झडपमा ३५ प्रदर्शनकारी घाइते भएका छन्। प्रहरी अधिकारीहरूको भनाइ अनुसार, प्रदर्शन योजनाबद्ध भएको थियो। तर त्यसलाई नियन्त्रणमा लिने सुरक्षा योजना निकै कमजोर थियो।

प्रदर्शनको सुरुवातमै दुर्गा प्रसाईंले आफैं गाडी चलाउँदै प्रहरीलाई धक्का दिँदै निषेधित क्षेत्र तोड्न प्रयास गरेका थिए। प्रहरीले उनलाई रोक्न प्रयास नगर्दा घट्नाले झन उग्र रुप लियो।

प्रसाईंलाई मात्र होइन,राप्रपाका वरिष्ठ उपाध्यक्ष रवीन्द्र मिश्र, महामन्त्री धवलशमशेर राणा,लगायतका नेताहरूले पनि प्रदर्शनलाई उग्र बनाउन निर्देशन दिएका थिए। प्रत्यक्षदर्शीका अनुसार, दुर्गा प्रसाईं र रवीन्द्र मिश्रले प्रदर्शनकारीलाई प्रहरीको घेरा तोड्न उक्साएका थिए, जसले स्थिति अझ जटिल बनायो।

प्रहरी नायब महानिरीक्षक (डिआइजी) बढुवाको रेसमा रहेका अधिकारीहरूले एसएसपी विश्व अधिकारीको नेतृत्व र क्षमतामाथि प्रश्न उठेको छ।

कुनै पनि बेला काठमाडौंको कुनै पनि यूनिट कमाण्ड नगरेका र प्रहरी प्रधानकार्यालयमा फाइल बोकेर तलमाथि गरेका अधिकारीले काठमाडौंको भूगोल वस्तुस्थिति बुझ्न नसक्दा यस्तोअवस्था आएको हो।

उनी एसपी हुँदा मोरङ र कैलाली दुवै ठाउँमा असफल भएका प्रहरी अधिकारी हुन्। काठमाडौंमा पनि उनी असफल भएका छन्। निकै सोर्सबाट काठमाडौं आएका उनले राम्रो कार्यसम्पादन र क्षमता देखाउन सकेनन्।