सरकारले मेडिकल र राहत सामग्री म्यानमार पठाउने, सेनाको टोली पनि जाने

काठमाडौं । नेपाल सरकारले भूकम्प प्रभावितका लागि अत्यावश्यक राहत तथा मेडिकल सामग्रीहरू म्यानमाार पठाउने भएको छ। यहि चैत १५ गते गएको ७.७ रेक्टर स्केलको भूकम्पबाट प्रभावित भएका नागरिकका लागि राहत सामग्री तथा औषधी र मेडिकल उपकरणसहित नेपाल वायुसेवा निगमको जहाज म्यानमार पठाउने भएको हो।

मन्त्रिपरिषद्को सोमवार राति बसेको बैठकले विभिन्न निकायमा रहेको मौज्दात सामग्री तथा निजी क्षेत्रबाट प्राप्त मेडिकल सामग्री तथा औषधी म्यानमार पठाउने निर्णय गरेको सरकारका प्रवक्ता तथा सञ्चारमन्त्री पृथ्वीसुब्बा गुरुङले जानकारी दिए।

उनका अनुसार हवाई जहाज ढुवानीको खर्च अर्थ मन्त्रालयबाट वायु सेवा निगमको नाममा निकासा गर्ने निर्णय मन्त्रिपरिषद् बैठकले गरेको छ।

सरकारले नेपाली सेनाको चिकित्सक टोलीलाई पनि म्यानमार पठाउने निर्णय गरेको छ। सेनाको आफ्नै जहाजबाट अत्यावश्यक मेडिकल सामग्रीसहित सेनाको टोली म्यानमार जाने गुरुङले बताए।