अन्तर्राष्ट्रिय औद्योगिक प्रदर्शनीमा उद्यमशील गजल सन्ध्या -२०८१ सम्पन्न
प्रेम प्रसाद कडेल
चितवन। चितवन उद्योग संघको आयोजनामा गजल मञ्च चितवनको सहकार्यमा उद्धमशील गजल सन्ध्या -२०८१ खुला गजल वाचन कार्यक्रम गजल मञ्च चितवनका अध्यक्ष रामकृष्ण अनायासको सभापतित्वमा सम्पन्न भयो।
कार्यक्रममा चितवन उद्योग संघका पूर्वअध्यक्ष राजु पौडेल र प्रमुख लेखा अधिकृत भोजराज अर्यालले चितवन उद्योग संघले साहित्यमा उद्यमशीलता प्रवर्द्धन गर्ने उद्देश्यले यो कार्यक्रमको आयोजन गरेको बताउँदै सारगर्भित मन्तव्य राखेका थिए।
कार्यक्रममा गजलकारहरू पुष्प अधिकारी अञ्जली, प्रेम कडेल उदय, भानु सापकोटा, सरगम पारु, रामलाल कुमाल, सीता रेग्मी, देवेन्द्र सापकोटा, सरस्वती पौडेल,दिपक लामिछाने, राजेश रुम्बा लामा, समिन घिमिरे, सिरु सिलवाल, भुवन सापकोटा लगायतले रोचक एवम् सुमधुर स्वरमा गजल वाचन गरेका थिए।
कार्यक्रममा नेपाल सरकार उद्योग वाणिज्य तथा आपूर्ति मन्त्रालय व्यापार तथा निकासी प्रवर्द्धन केन्द्रका अधिकृत जयन्द्र बोगटी, गजल मञ्च चितवनका सल्लाहकार पुष्प अधिकारी अञ्जली, चितवन दुग्ध उत्पादक सहकारी संघका अध्यक्ष किशोर बगालेको उपस्थित रहेको थियो।
कार्यक्रम चितवन उद्योग संघको प्रदर्शनी सभाहलमा रोमाञ्चक अनुभूति एवम् आकर्षकरुपले सम्पन्न भएको समापन मन्तव्य राख्दै रामकृष्ण अनायासले यस्ता गतिविधिले चितवनको साहित्यिक आकाश फराकिलो हुने बताउदैं चितवन उद्योग संघलाई धन्यवाद ज्ञापन गरे।
कार्यक्रममा गजल मञ्च चितवनलाई चितवन उद्योग संघले मायाको चिनो समेत प्रदान गरेको थियो। कार्यक्रमको सहजीकरण गजल मञ्च चितवनका सचिव प्रमिला सानुले गरेकी थिइन्।
चितवन उद्योग संघका कार्यवाहक अध्यक्ष मदन घिमिरेले कार्यक्रममा सम्पूर्ण गजलकारहरूलाई हार्दिक धन्यवादसहित स्वागत मन्तव्य राखेका थिए।