सरकारले सेवानिवृत्त कर्मचारीका अनुभव उपयोग गर्ने
काठमाडौं। सरकारले सेवानिवृत्त निजामती कर्मचारीका ज्ञान, सिप र अनुभवलाई राष्ट्रसेवामा उपयोग गर्ने भएको छ। सेवानिवृत्त कर्मचारी सेवा अवधिमा विभिन्न क्षेत्रमा कार्यरत रहँदाका अनुभवलाई उपभोग गर्ने गृहकार्य थालेको हो।
मुख्यसचिव एकनारायण अर्यालको संयोजकत्वमा गत फागुन ५ गते बसेको सचिवस्तरीय बैठकले संघीय, मामिला तथा सामान्य प्रशासन मन्त्रालयका सचिवको संयोजकत्वमा तीन सदस्यीय सेवानिवृत्त राष्ट्रसेवकका अनुभवलाई कार्यान्वयन गर्नका लागि प्रतिवेदन बुझाउन समिति बनाउने निर्णय गरेको थियो।
समितिमा गृहसचिव तथा प्रधानमन्त्री तथा मन्त्रीपरिषद्को कार्यालयका शासकीय मामिला हेर्ने सचिव सदस्य छन्। समितिले अहिले सरोकारवालासँग राय संकलन गर्ने कार्य गरिरहेको समितिका संयोजक एवं संघीय, मामिला तथा सामान्य प्रशासन मन्त्रालयका सचिव रविलाल पन्थले जानकारी दिए।
समितिले सेवानिवृत्त राष्ट्रसेवकले राष्ट्रसेवामा कसरी योगदान दिन सक्छन् भन्ने विषयमा दुई महिनाभित्र स्पष्ट कार्ययोजना तयार पार्ने छ। साथै उनीहरूले पालना गर्नुपर्ने आचारसंहितालाई संहिताबद्ध गर्न मसौदा तयार पार्ने जिम्मेवारी समितिलाई दिइएको पन्थले बताए।
उनका अनुसार एकीकृत कार्यालय व्यवस्थापन प्रणाली लागु गरी पूर्णरूपमा कार्यान्वयन गराउने, सबै सरकारी कार्यालयमा क्यूआर कोडसहितको एकीकृत कार्यालय व्यवस्थापन प्रणाली लागु गर्ने,डिजिटल हस्ताक्षरको व्यवस्था पूर्णरूपमा कार्यान्वयन गराउने, नागरिक एपमार्फत छिटो सेवा प्रवाह सार्वजनिक निकायले नागरिक एपलाई अझ प्रभावकारी बनाउने र सेवा प्रवाह छिटो तथा प्रविधिमैत्री बनाउने, समयमै सेवा प्रवाह र निर्णयको नियमित अनुगमन केन्द्रीय निकाय र राष्ट्रिय सतर्कता केन्द्रले गर्ने गरी राय सुझाव लिइरहेको छ।
त्यस्तै फाइल व्यवस्थापनमा सुधार गर्न विभिन्न मन्त्रालयमा फाइल निर्णयमा ढिलाइ हुने समस्या समाधान गर्न संशोधित सुशासन सञ्चालन तथा व्यवस्थापन ऐन तथा कार्यसम्पादन नियमावली अनुसार तोकिएको समयभित्रै फाइल टुङ्याउनुपर्ने व्यवस्था गर्ने गरी प्रतिवेदन तयार गर्ने छ।