बोक्सीको आरोप लगाउँदै महिलामाथि कुटपिट गर्ने चार जना पक्राउ
कैलाली । कैलालीमा एक महिलामाथि बोक्सीको आरोप लगाउँदै निर्घात कुटपिट गर्ने चार जनालाई प्रहरीले पक्राउ गरेको छ । भजनी नगरपालिका–१ गौनैयाकी २८ वर्षीया महिलालाई बोक्सी भन्दै कुटपिट गर्ने मनोज चौधरी गुरुवासहितका चार जनालाई पक्राउ गरिएको प्रहरीले जनाएको छ ।
पक्राउ पर्नेमा भजनी नगरपालिका–१ का २८ वर्षीय मनोज चौधरी, ५१ वर्षीय बाबुराम चौधरी, ४५ वर्षीय लाहानु चौधरी र ३५ वर्षीय रुपा चौधरी रहेको कैलालीका प्रमुख प्रहरी उपरीक्षक (एसपी) पदमबहादुर विष्टले जानकारी दिए ।
२८ वर्षीया महिलामाथि बोक्सीको आरोपमा कुटपिट गरेको किटानी जाहेरी परेपछि उनीहरुलाई इलाका प्रहरी कार्यालय भजनीले पक्राउ गरेको हो। किटानी जाहेरी दिइएकामध्ये दुईजना फरार रहेका छन्। उनीहरुको खोजी भइरहेको प्रहरीले जनाएको छ। कुटपिटमा परेकी महिलाको धनगढीको नवजीवन अस्पतालमा उपचार भइरहेको छ।