तेल बोक्ने ट्यांकरमा गाँजा तस्करी गर्ने २ जना पक्राउ
काठमाडौं,जेठ १२। तेल बोक्ने ट्यांकरमा लागुऔषध गाँजा तस्करी गर्ने २ जना पक्राउ परेका छन् । बारा प्रहरीले उनीहरुलाई पक्राउ गरेको हो। प्रहरी चौकी पथलैयाबाट खटिएको प्रहरी टोलीले तेल बोक्ने ट्यांकरबाट २१८ किलो गाँजासहित २ जनालाई बुधबार पक्राउ गरेको हो।
पक्राउ पर्नेमा महोत्तरीको बर्दिवास नरपालिका–८ का ३३ वर्षीय घनश्याम गिरी र चितवनको खैरहनी नगरपालिका–२ का राजकुमार दवाडी छन्।
गिरी ना ४ ख २९७९ नम्रबको ट्यांकरका चालक हुन् भने दवाडी सहचालक हुन्।
बाराको जितपर सिमरा उपमहानगरपालिका–१ पथलैया चोकमा रहेको महमल आलम साहको रामरहिम ग्यारेजबाट गाँजासहित उनीहरुलाई प्रहरीले नियन्त्रणमा लिएको हो।
चालक गिरीले काठमाडौंबाट भारतको बरौलीमा तेल लिन जानको लागि भन्दै उक्त ट्यांकर बारा पुर्याएका थिए।
पूर्वसूचना अनुसार प्रहरी चौकी पथलैयाबाट खटिएको प्रहरी टोलीले जाँच गर्दा ट्यांकरमा फल्स बटम बनाई रातो प्लाष्टिकमा पोका बनाइ राखेको अवस्थामा २१८ किलो गाँजा बरामद भएको हो।