अटो दुर्घटना हुँदा एक महिलाको मृत्यु

काठमाडौँ । सुनसरीको इटहरीमा अटो दुर्घटना हुँदा एक महिलाको ज्यान गएको छ । मृत्यु हुनेमा इटहरी उपमहानगरपालिका–४ की ३३ वर्षीया रिया पोखरेल रहेकी छन् ।

आइतबार इटहरीबाट तालतलैयातर्फ जाँदै गरेको को२ह ५२६५ नम्बरको अटो इटहरी–३ मा आफैँ अनियन्त्रीत भई बिजुलीको पोलमा ठोक्किएको थियो । उक्त दुर्घटनामा अटोमा सवार रहेकी रिया घाइते भएकी थिइन् ।

घाइते उनलाई उपचारको लागि बिराट नर्सिङहोम लगिएको थियो । अस्पतालमा उपचारको क्रममा उनको मृत्यु भएको इलाका प्रहरी कार्यालय इटहरीले जनाएको छ । प्रहरीका अनुसार घटना सम्बन्धमा थप अनुसन्धान भइरहेको छ ।