हत्या गरेको आरोपमा २५ वर्षीय एक युवक पक्राउ
सङ्खुवासभा । सङ्खुवासभामा मितबाबुको हत्या गरेको आरोपमा पक्राउ परेका छन् । पक्राउ पर्नेमा भोजपुरको साल्पासिलिचो गाउँपालिका– ४ घर भई बिगत ३ वर्षदेखि तुम्लिङटार आसपास एरियामा बसोबास गर्ने २५ वर्षीय युवराज राई रहेका छन् ।
मितबाबु खाँदवारी नगरपालिका–९ का ४७ वर्षीय लक्ष्मण कुमालको हत्या गरेको आरोपमा प्रहरीले उनलाई पक्राउ गरेको हो । गत असार ३० गते कुमाल आफ्नै घरमा मृतावस्थामा फेला परेका थिए ।
घटनास्थलको प्रकृति हेर्दा हत्या भएको अनुमान गरी अनुसन्धान थालेको जिल्ला प्रहरी कार्यालय संखुवासभाको प्रहरी टोलीले आइतबार राईलाई पक्राउ गरेको हो । अनुसन्धानका क्रममा प्रहरी टोलीले मृतककै मित छोरा नाता पर्ने राईलाई पक्राउ गरी सोधपुछ गरेको थियो ।
सोधपुछका क्रममा राईले घटनामा आफ्नो संग्लग्नता रहेको स्वीकार गरेको प्रहरीले जनाएको छ । घटना सम्बन्धमा थप अनुसन्धान भइरहेको जिल्ला प्रहरी कार्यालय संखुवासभाले जनाएको छ