चलचित्र ‘लप्पन छप्पन २’ को एक साता पछि प्रदर्शन हुने
काठमाडौं। चलचित्र ‘लप्पन छप्पन २’ को नयाँ प्रदर्शन मिति सार्वजनिक भएको छ। फागुन १३ गते प्रदर्शन हुने भनिएको यो चलचित्र अब फागुनको २० गतेमात्रै प्रदर्शन हुने भएको हो।
चलचित्रका निर्देशक मुकुन्द भट्टले सामाजिक सञ्जालमा चलचित्रको पोस्टर सार्वजनिक गर्दै नयाँ मितिबारे जानकारी दिएका हुन्।
फागुन १३ गते सुदर्शन थापाको निर्देशनमा बनेको चलचित्र ‘म यस्तो गीत गाउँछु २’ प्रदर्शन हुन लागेको कारण चलचित्रको प्रदर्शन मिति सारिएको हो।
चलचित्र कोरोना भाइरस महामारीका कारण २ वर्षदेखि प्रदर्शनको लागि कुरेर बसिरहेको छ।
चलचित्रमा सौगात मल्ल, शिव श्रेष्ठ, अर्पण थापा, अनुप बिक्रम शाही, एन्जल श्रेष्ठ लगायतका कलाकारको अभिनय रहेको छ। चलचित्रको कथा निर्देशक भट्ट र सुनिल नेउरेले लेखेका हुन्।
यो चलचित्र नेपाली भाषासँगै हिन्दी, तमिल, तेलुगु, भोजपुरी र चानियाँ गरी ६ भाषामा रिलिज हुने समेत बताइएको छ।