बालुवाटारमा गठबन्धनको बैठक सुरू, सहमति नभए गठबन्धन तोडिने
काठमाडौं । नयाँ सरकार गठनका लागि छलफल गर्न सत्ता गठबन्धनमा रहेका दलहरबीचको छलफल सुरू भएको छ ।
प्रधानमन्त्री निवास बालुवाटारमा सुरू भएको बैठकमा खास गरी नयाँ प्रधानमन्त्री को बन्ने भन्ने विषयमा छलफल केन्द्रित रहेको छ । गठबन्धनबाटै प्रधानमन्त्री बनाउन दलहरु अन्तिम कसरतमा लागेका हुन् ।
राष्ट्रपति विद्यादेवी भण्डारीले नयाँ सरकार गठनका लागि दिनु भएको समयसीमा आज साँझ ५ बजे सकिदैछ । त्यसअघि सहमति जुटाएर प्रधानमन्त्रीका लागि गठबनधनबाट साझा उम्मेदवार बनाएर राष्ट्रपतिकहाँ नाम सिफारिस गर्न दलहरु सहमतिका लागि प्रयासमा लागेका हुन् ।
खासगरी प्रधानमन्त्रीका लागि कांग्रेस सभापति एवं वर्तमान प्रधानमन्त्री शेरबहादुर देउवा र नेकपा माओवादी केन्द्रका अध्यक्ष पुष्पकमल दाहालबीच आलोपालो को पहिला प्रधानमन्त्री बन्ने भन्ने विषयमा सहमति जुट्न सकेको छैन । दाहालले आफूले पहिलो २ वर्ष प्रधानमन्त्री पाउनु पर्ने अडान राख्दै आउनु भएको छ । उता देउवाले पनि ठूलो दलको हैसियतले पहिले कांग्रेसबाटै प्रधानमन्त्री हुनुपर्ने अडान राख्दै आउनु भएको छ ।
यदि छलफलमा सहमति नजुटे गठबन्धन भत्किनेछ । त्यसो हुँदा माओवादी या कांग्रेसले प्रमुख प्रतिपक्षी दल नेकपा एमालेसंग सहकार्यको लागि छलफल गर्नुपर्नेछ । कांग्रेस र माओवादीबीच सहमति नजुटे प्रदेश सरकारका लागि पनि नयाँ सत्ता समीकरण बन्न सक्नेछ ।