प्रहरी महानिरीक्षक बसन्त कुँवर र ललितपुरका मेयर चिरीबाबु महर्जनविरुद्ध अख्तियारमा उजुरी
काठमाडौं। भूमाफियाको प्रभावमा परेर प्रहरी कार्यालय रहेको सरकारी जग्गामा बिजनेश कम्प्लेक्स बनाउन लागिएको भन्दै प्रहरी महानिरीक्षक बसन्त कुँवर तथा ललितपुरका मेयर चिरीबाबु महर्जनविरुद्ध स्थानीयले अख्तियार दुरुपयोग अनुसन्धान आयोगमा उजुरी दिएका छन्।
ललितपुर महानगरले लगनखेलस्थित प्रहरी कार्यालय हटाएर व्यापारिक भवन बनाउन लागेको भन्दै स्थानीयवासी अख्तियार पुगेका हुन्। चलखेलका आधारमा सरकारी जग्गामा व्यापारिक भवन बनाउन लागिएको उनीहरूको आरोप छ।
महानगरपालिकाले केही व्यापारीको स्वार्थमा सरकारी जग्गामा व्यापारिक कम्प्लेक्स बनाएर प्रहरी कार्यालय हटाउन लागेपछि विरोध हुँदै आएको छ ।
यसमा एकातर्फ भ्रष्टाचार रहेको र अर्कोतर्फ शान्ति सुरक्षासमेत प्रभावित हुने भएपछि स्थानीयहरू अख्तियारसम्म पुगेका छन्।लगनखेल बसपार्कसँगै जोडिएको करिब तीन रोपनी जग्गामा महानगरपालिकाले व्यापारिक कम्प्लेक्स बनाउने निर्णय गरेको थियोर।
जहाँ रहेको १२ नम्बर वडा कार्यालय हटाइएको छ भने प्रहरी कार्यालय पनि हटाउन दबाब दिइएको छर। तर, स्थानीयले प्रहरी कार्यालय नहटाउन माग गरेका छन्।
व्यापारी केबी महर्जनको सो जग्गासँगै अर्को जग्गा भएको र सो जग्गालाई बाटो ठूलो बनाउनकै लागि व्यापारिक कम्प्लेक्स बनाउन लागिएको हो।
महानगरपालिकाले गत भदौमा सो जग्गामा व्यापारिक कम्प्लेक्स बनाउने सम्झौता गरेको थियोर । तर, वडा प्रहरी कार्यालय हटाउन नसक्दा व्यापारी दौडधुपमा लागेका थिए।
सो कार्यालय हटाउनका लागि भन्दै १९ वैशाखमा महानगरपालिकाले प्रहरी महानिरीक्षक कुँवरलाई समेत लगेर हस्ताक्षर गराएको थियोर।
जसकारण महानिरीक्षक कुँवरसमेत विवादमा मुछिएका छन् ।उनी पनि व्यापारीको प्रभावमा परेको आरोप स्थानीयले लगाएका छन्। स्थानीयको विरोध हुँदाहुँदै आफैं गएर प्रहरी कार्यालय हटाउन कुँवरले हस्ताक्षर गरिदिएका थिए।
त्यसविरुद्ध लगनखेल समाज, लगनेश्वर महादेव यातायात प्रालि, करुणा टोल सुधार समिति, कुमारीपाटी क्लब, लगनखेल भजन मण्डल, बुद्धि विकास मण्डल, हनुमान सेवा केन्द्र, लगनखेल युथ क्लब, लगनखेल महिला समूह,थटी टोल सुधार समितिलगायतले अख्तियारमा उजुरी गरेका हुन्।