नेपाल सुपर लिगमा आज झापा र काठमाडौं भिड्दै
काठमाडौं। नेपाल सुपर लिग (एनएसएल) मा आज झापा एफसी र काठमाडौं रेजर्स एफसीबीच प्रतिस्पर्धा हुँदैछ। खेल त्रिपुरेश्वरस्थित दशरथ रंगशालामा साँझ ५ बजेबाट सुरु हुनेछ।
झापा पहिलो जितको लक्ष्यसहित मैदानमा उत्रिदा काठमाडौं रेजर्स दुई गोलको जित निकाल्दै अंकतालिकाको शीर्ष स्थानमा पुग्ने रणनीतिसहित मैदानमा हुनेछ।
जारी खेलमा १ अंक सहित अंक तालिकाको आठौं स्थानमा रहेको जितबिहीन झापा एफसी आज पहिलो जितको खोजीमा हुनेछ। जारी खेलमा पोखरा थन्डर्सविरुद्ध १/१ को बराबरी खेलेको झपाले इस्पोर्टिङ इलामसँगको खेलमा पेनाल्टीमा चुक्दा हार बेहोरेको थियो।
यता अघिल्लो सिजनको साविक विजेता काठमाडौँ रेजर्स आफ्नो तेस्रो खेलमा आज दुई गोलको जित निकाल्दै अंक तालिकाको शीर्ष स्थानमा पुग्ने लक्ष्यमा मैदान जानेछ।
रेजर्सले पहिलो खेलमा स्पोर्टिङ इलामलाई १-० ले हराएको थियो। विदेशी खेलाडीको वचस्व रहेको दुवै टोलीले आफ्नो पछिल्लो खेलमा इन्ज्युरी समयको गोलको सहयोगले हार टारेका थिए।